嶺南大學早前舉行畢業禮,學生會喺場外派發黃絲帶,唔少畢業學生又喺場內動作多多,仲打斷獲頒工商管理榮譽博士學位嘅前商務及經濟發展局局長馬時亨發言,校園政治風盛,南太集團創辦人顧明均提早表態,拒絕接受浸會大學喺畢業禮上向佢頒授工商管理榮譽博士,以示反佔中立場。

唐偉章勸學生早啲重返校園讀書。

校長籲學生重返校

尋日輪到理工大學舉行畢業禮,正當外界以為又有好戲睇時,殊不知場面卻好平靜、和諧,細問之下,原來尋日畢業禮只係畀博士畢業生同榮譽學位得主出席,當中唔少人係內地生,榮譽學位得主又冇乜爭議性,加上理大學生會近日傳出內訌,難怪無乜抗爭場面喇!理大校長唐偉章就話,解決政制爭議始終要透過對話尋求共識,希望各方都勇於妥協,又話大家應該聚焦政制框架內嘅可行性。佢坦言好彩冇學生因佔中受傷,呼籲學生快啲返校園咁話。

第一手消息請下載on.cc東網iPhone/iPad/Android/Windows Phone Apps