政壇：兩個胡志偉佔鐘結緣

同名同姓大有人在，尋日金鐘佔領區舉辦多場民主講場，主辦單位特意安排兩位胡志偉前後腳開講，呢幕「胡志偉遇上胡志偉」嘅巧合明顯係人為，巧合嘅只係原來佢哋兩個都係第一次見啫。

牧師胡志偉（左）同立法會嘅胡志偉都係主講嘉賓。

尋日嘅講場，由教牧關懷團召集人胡志偉牧師首先登場，佢解構民主及基督信仰，跟住登場嘅係白鴿黨嘅立法會議員胡志偉，佢就講民主化如何解決房屋問題。兩個胡志偉各有各講，雖然係第一次見，但之前都話聽聞過對方大名，今次喺白鴿黨人刻意安排下結緣，都幾得意。