政壇：高錕當黑地氈係深窿
腦退化症愈來愈普遍，大家都知患者除咗欠缺時間感及方向感，但原來佢哋視覺上嘅立體感亦會消失。患有腦退化症嘅中文大學前校長高錕一直由太太高黃美芸悉心照料，尋日高太出席一個為腦退化症設計家居比賽嘅啟動禮上，自爆高錕曾經以為屋企門口嘅黑色地氈係個黑色地窿，所以唔敢行前一步。
高黃美芸（前）應余遠騁（後）邀請擔任家居設計比賽嘅評審。
腦退化失立體感
高太話，腦退化患者難以分辨眼前景物深闊等維度空間，有次佢見高錕企喺門前唔肯郁，先知佢以為黑色地氈係深不見底嘅窟窿。仲有，若有人要同高錕傾談，對方亦要出現喺高錕視線嘅正前方至得。籌辦今次家居設計比賽的世界綠色組織行政總裁余遠騁就話，腦退化患者若身處全白色嘅洗手間，隨時無法分辨馬桶嘅位置，所以患者嘅家居設施必須以唔同顏色區分，希望透過比賽改善腦退化患者嘅家居生活質素。
