政壇：獅山拆幡拆漏繩 阿涂亂投訴
佔領行動令到本港社會撕裂、政界分裂，呢個時候，立法會議員嘅一言一行都應該謹慎，否則只會亂上添亂。白鴿黨立法會議員涂謹申尋日去信漁護署署長黃志光，責難漁護署同消防處喺獅子山清拆「我要真普選」字樣嘅巨型黃色直幡嘅手尾，佢話，當局喺清拆直幡時留低嘅繩索會對人構成生命危險，要求當局清除喎。阿涂呢個行動係吹毛求疵，定係刻意挑剔，大家一望就知，點解有人掛幾十米直幡嘅時候佢唔投訴，反而拆除遺漏繩索又刁難呢？呢種鬥氣兼抽水嘅監察政府手法，真係令人眼界大開、倒抽一口涼氣噃。
設計圖片及對白
行動違反郊園規例
幾名自稱「香港蜘蛛仔」嘅攀山愛好者，日前喺獅子山山頂掛咗一幅印有黃色雨傘及上述字樣嘅巨型直幡，引起各界關注，但大家都知呢班香港蜘蛛仔涉嫌違法，因為根據《郊野公園及特別地區規例》，任何人未經許可在郊野公園展示任何標誌、告示、海報、條幅都屬違例，違例者最高可被判罰款二千元同監禁三個月。試想像，如果人人都未經許可掛橫幅、直幡，咁香港大把免費廣告位喇，只管佔領咪得囉，掛幾大個「我愛你」、「買三送一」嘅巨型海報都冇問題喇。
阿涂身為律師，冇可能話唔知，但佢偏偏唔投訴蜘蛛仔掛直幡涉違法、兼有危險，反而投訴當局拆直幡時將大量嘅繩索同碎繩棄置喺攀石用嘅固定片上，又將剪咗嘅繩棄置喺峭壁之下，唔止破壞獅子山美景，仲可能會對登山同攀石人士構成生命危險，呢兩個原因喺掛直幡嘅時候唔存在咩﹖
帶頭守法、捍衞法治係公民應有之義，立法會議員更唔少得，政見可以唔同，但法律冇可能因人而異、因事而異，泛民議員若拋開理性，一味搞不合作，出醜嘅終歸係自己。
