「散水餅」呢個潮語係嚟自辦公室，因為唔知幾時開始，當一個人喺某公司辭咗職，到咗最後一個工作天，就要買西餅請同事食，呢種表面係想向同事道謝，實質係辦公室潛規則嘅虛偽行為，就叫請食「散水餅」。

天下無不散之水，人世間本來就係有聚有散，聚時開心，散無遺憾，人生根本如此。到底佔領旺角、銅鑼灣及金鐘嘅雨傘運動幾時結束？呢個問題其實應該問邊位？好多人怪責示威者霸佔馬路，會問示威者幾時散水。但係自從九月二十八日開始佔領以嚟，政府都冇正式回應過任何示威者嘅訴求，咁又點可以叫示威者停止佔領？幾時結束佔領呢個問題，係應該問政府，而唔係問示威人士。

美其名係一種禮貌，但我覺得只係扮晒嘢，留下好印象畀老細或者舊同事。因為正所謂山水有相逢，第時喺第度見番面都會有斗零好印象，亦可留一條後路畀自己，因為唔知道會唔會有一日食回頭草返娘家再續「錢」緣，凡事留一線，日後好相見。所以，「散水餅」係有必要請。其實以前一直有呢個Last Day請食嘢嘅規矩，不過往日係會請下午茶，後來就變成「散水餅」。如果公司大，真係有機會請到窮！

話時話，結束佔領嘅話，示威者可考慮向受影響嘅小商戶及市民派「散水餅」，多謝佢哋對運動嘅忍耐。不過，我最期待有朝一日政府啲官員可以向全港市民派「散水餅」！包括同學生會談時一言不發唔知做乜嘅劉江華，同埋國際笑柄馮煒光！不過，最想佢辭職派「散水餅」嘅人……始終係佢！

第一手消息請下載on.cc東網iPhone/iPad/Android/Windows Phone Apps