白鴿黨原本喺尋日舉行二十周年黨慶兼籌款晚宴，但該黨喺月頭舉行中常委會議時，以全力應付進行緊嘅佔領行動為由，決定將籌款晚宴押後至明年三月五號同春茗一齊搞。不過，有知情人士透露，押後黨慶嘅原因並唔單止因為佔領行動咁簡單，而係因為籌款額遲遲未達標，所以就以佔領行動為藉口將晚宴押後。

設計圖片及對白

其實，該黨主席劉慧卿早已豪言話要「搞大佢」，準備筵開五十席向各方好友揼心口捐錢。至於籌款金額方面，雖然白鴿黨「AV仁」何俊仁喺舊年籌款晚宴後爆出賣假畫風波，但當晚依然籌到二百三十五萬元，自然食過翻尋味，今年仲定出六百萬元嘅籌款目標，比舊年提升一倍。

吸金能力大不如前

但據了解，雖然「賣枱」反應良好，五十圍酒席早已沽清，但至今只籌到一百萬元左右，距離六百萬元仲差成一大截。知情人士透露，該黨吸金力已大不如前，加上依家佔領行動鬧得熱烘烘，有心捐錢嘅人都會選擇直接捐錢畀佔領行動相關組織。

黨團召集人單仲偕就話，押後晚宴完全係因為政治原因，絕對同籌款額未達標無關。佢又話該黨現時初步籌得款項已經超逾舊年嘅「賣枱」金額，至於暫時籌到幾多就不便透露。

不過，即使籌款成績唔錯，但現時佔領行動風頭火勢，佔領人士風餐露宿，泛民政黨都唔應該喺呢個時候搞飲宴啦，你估真係「去飲」咩？

第一手消息請下載on.cc東網iPhone/iPad/Android/Windows Phone Apps