新界鄉議局尋日舉行「新界日」研討會,廣邀新界鄉紳出席表達意見,同齊集鄉議局「大祠堂」連開二十七圍食盆菜。局方更邀請民政事務局前局長「藍爺」藍鴻震、立法會前議員劉秀成同天文台前台長林超英等人就新界議題發表演講。由於佔領行動持續近一個月,藍爺坦言其名句「everything under control(一切在控制範圍內)」已經唔能夠形容佔領行動現況嘞!

藍鴻震呼籲佔領學生返屋企先。

向來強調要保衞中環嘅藍爺出席研討會後話,佔領行動已登上國際雜誌,學生訴求亦已經傳達,「幾多偉人都做唔到(登上《時代》雜誌封面)」,呼籲佔中學生返屋企先。佢仲話雖然佔領行動近日冇咁失控,但形容「啲人can survive, in a difficult way(生活艱難)」,再係咁落去唔係辦法,希望學生為市民着想喎。

劉秀成講到佔領行動,居然套用曾任房屋及規劃地政局局長「孫公」孫明揚當年處理丁屋分配問題時所講嘅一句「時間可以解決一切」。不過,劉秀成笑言當年孫公至離任時,丁屋問題「都係擺咗喺枱度」未完成,唔通佢預料佔領行動都唔知擺到幾時?

講番研討會同盆菜宴,鄉議局主席劉皇發女婿余漢坤尋日夥拍鄉議局顧問Raymond梁海明擔任主持,雖然二人少有合作但相當合拍,仲齊齊以中山裝形象示人添。據知佢哋嘅中山裝係由余漢坤太太、任職時裝設計師嘅劉玉蓮設計,細節位係男士着起呢套中山裝打呔又得,唔打亦得,認真細心。

第一手消息請下載on.cc東網iPhone/iPad/Android/Windows Phone Apps