政壇：廖偉麟談佔領 重創地舖「劏場」
各行各業或多或少都受到佔領行動嘅影響，而紀惠集團副主席Jeffrey廖偉麟旗下有唔少甲級寫字樓，部分更係位於佔領區域，但佢估計，除非佔領行動持續超過多個月，否則對寫字樓租務方面應該影響唔大。佢解釋，雖然好多寫字樓都係位於佔領區，但寫字樓多數係長期合約，所以影響相對較低，反而地舖同商場「劏場」嘅影響就嚴重得多喇！
廖偉麟話佔領區域內嘅地舖同商場「劏場」生意最受影響。
Jeffrey話如果地舖生意太差，商戶有機會完咗合約就停止再租，或者有啲生意一般嘅商戶，就算無要求減租，亦可能需要免兩、三個月租去吸引佢哋續約，而商場「劏場」嘅經營就最為困難。住宅方面，近日有指二手樓成交量先淡靜後回升，部分樓價仲有上升趨勢。佢就認為一手住宅尤其一線豪宅嘅交投量理應唔受影響，反而二手住宅有機會較為淡靜。
