清華大學近日認真架勢，竟然同時有全球三大科技界猛人喺度聚會，真係好犀利呀！佢哋就係阿里巴巴董事局主席馬雲、蘋果公司嘅CEO庫克，以及facebook嘅創辦人「朱仔」朱克伯格。呢個組合真係可以用百年難得一遇嚟形容，如果唔係見到佢哋三個坐埋一齊嗰張相，真係唔敢相信呀！

聽啲學生講，朱仔已喺日前畀清華請咗去做經管學院學術顧問委員，佢日前仲應邀進入一個教授經管嘅課堂上面，用中文完成成個訪問；而佢上個月又請咗二十個清華學生做工程師，就連辦公室都已經一早租定北京嘅核心專區，睇嚟朱仔為咗打入中國市場，都真係下咗唔小決心。至於庫克呢，佢就話要繼續加大喺中國嘅投入，兩年內要將十五間Apple零售分店增加到四十間，又真係幾雄心壯志喎。

其實呢，佢哋三個嘅業務都可謂平分秋色，但同時又環環相扣，今次因利乘便可以同枱食飯，唔知會唔會傾傾吓偈傾出啲世紀合作大計添！

第一手消息請下載on.cc東網iPhone/iPad/Android/Windows Phone Apps