政壇：不合作玩出火 泛民收手
為配合佔領行動，泛民主派宣布喺議會內發起不合作運動，幾乎全力阻撓政府政策出台，令市民受害。不過，泛民始終係民意代表，一舉一動都受公眾影響，唔少地區居民對泛民嘅表現非常不滿，要求佢哋唔好乜嘢議題都「拉布」，泛民眼見玩出火，擔心拖垮明年區議會選情，所以決定「收手」放生民生政策議題。
設計圖片及對白
財務委員會尋日繼續討論向環境保護署斥資十五億八千九百萬元，興建小蠔灣有機廚餘回收中心。泛民原本喺上星期會議上不斷提出休會動議，要求暫停討論相關嘅撥款申請，但佢哋尋日就無再照辦煮碗咁做，而喺人民力量「大舊」陳偉業提出休會動議時，一個泛民都無出聲「幫口」，淨係喺投票時紛紛「歸位」投支持票，但因為唔夠建制派多人而被否決。
公文袋坐定定投贊成
雖然多名泛民議員之後都有向環境局局長黃錦星質詢，例如質疑興建有機廚餘回收中心要使成十五億係太貴，又關注政府點樣確保承辦商嘅營運表現，但都係問多幾次就無再問落去，剩低大舊同社民連梁國雄不斷係咁問，佢哋同新民主同盟范國威更加就撥款申請合共提出四十項臨時動議，但全數被否決，最後財委會以三十七票贊成、 一票反對通過有關撥款申請，公文袋三位議員更加坐定定投贊成票。
飯盒會召集人梁家傑話，飯盒會開會時曾討論過點樣處理財委會嘅各項議程，最後決定由飯盒會二十三位議員去信主席張宇人，要求佢調動財委會議程，將較少爭議嘅撥款申請調前，盡快通過同民生相關嘅事項。民協馮檢基就話由於有機廚餘回收中心係民生議題，加上泛民各黨有唔同立場，所以唔會阻止通過。泛民之所以一時一樣，講到尾都係選票作怪啫！
