城中鏡：馬雲赴美想做影視大亨
阿里巴巴嘅帝國版圖已遍布唔同層面，但主席馬雲似乎仍未滿足。近日又傳出佢同美國影視界人士接洽，唔通佢嘅野心已經伸延到去荷里活？除咗中國電商一哥外，仲做埋影視大亨添！
聽聞馬雲日前帶埋班阿里巴巴高層飛去美國，同美國影視界製作嘅老細們會面。（資料圖片）
聽講馬雲帶埋一班阿里巴巴高層飛去美國，同美國影視界製作嘅老細們會面，當中都包括唔少我哋耳熟能詳、由細睇到大嘅電影公司，例如獅門、迪士尼、派拉蒙、華納兄弟、索尼等公司，似乎佢唔單止想入股佢哋投資，仲想促成喺中國發行美國電影同電視劇。其實馬雲旗下另一家上市公司、前稱文化中國傳播、啱啱先至改名嘅阿里影業就可以擔大旗，進軍荷里活喇！
講真，阿里巴巴九月喺美國公開招股，集資二百五十億美元，馬雲已講明集資所得嘅錢會用嚟大展拳腳，家陣佢已經好努力咁利用天貓機頂盒將娛樂節目帶畀中國消費者，以及透過旗下電子商務平台出售各種商品，睇怕今後，中國用家可以喺阿里嘅平台一路睇住荷里活猛片同電視劇，一路上網shopping。
