城中鏡：東華秋祭祈願社會回穩
東華三院主席Ivan施榮恆尋日與一眾董事局成員，喺中午時分齊集上環文武廟外，齊齊按傳統穿上唐裝長袍玄褂入廟，進行每年一度嘅秋祭祭祀儀式，祈願香港社會可以恢復穩定，佔領行動早日得到共識和平結束。
東華三院己酉年主席兼香港佛教聯合會副會長黎時煖（右）帶領整個秋祭儀式進行。
施榮恆（左起）與副主席何超蕸、馬陳家歡、李鋈麟、王賢誌及陳祖恒，昨穿上黑藍色長褂齊集上環文武廟秋祭。
東華辛巳年主席周振基亦有出席秋祭儀式，擔任頌祝者。
施榮恆Ivan話佢哋呢身黑藍色長褂係東華多年傳統服飾，每個董事局成員加入時，都會搵師傅度身訂造一套，但佢哥哥施榮懷就留咗一套畀佢，所以佢就可以環保啲，唔使再造。不過，佢透露長褂入面本來仲有條唐裝褲襯埋一套，但因為唔方便行動又冇人會睇到，佢都係着番西褲就算喇！
除咗交通之外，Ivan話佔領行動對佢個人影響不太大，但佢個七歲囝囝就經常有意見。由於佢囝囝不時會喺電視睇到有關佔領嘅新聞及資訊，但又可能未識分析，有時會同佢講「爸爸我要支持佔中」，但有時又話「爸爸我要反佔中」，一時一樣，佢要花好多時間解釋當前發生緊乜嘢事。
王賢誌為準時兜大圈
副主席王賢誌就話佔領行動開始之後，佢習慣每去一個地方前都會先諗諗邊條路最快。有次佢要半個鐘內由上環去鰂魚涌，決定先由西隧兜去九龍，再經啟德及觀塘繞道往東隧返回港島，兜咗個大圈但就可以準時到達。
個祭祀儀式步驟包括神禮、初獻禮、恭頌祝禮等，頗為複雜，但本身信奉基督教嘅副主席陳祖恒都耐心完成，佢話唔怕儀式同佢個人宗教有衝突，事關覺得好多中國傳統習俗都好有意思，非常值得保留，好似農曆新年、中秋節呢啲傳統節日，大家一樣可以從習俗中感受到良好氣氛。
