政壇：搞搞政：中出換屆象哥交棒 立會個位多人吼
其實立法會進出口界議員「象哥」黃定光講咗好多次話要退位讓賢，但始終都係話退唔退。咁啱香港中華出入口商會（中出）日前舉行換屆選舉，從中可以睇到唔少端倪，例如兩位大熱門接班人許華傑同周浩鼎都出任副秘書長，仍然留喺「叫胡」位置。不過，當中有個人要特別留意，就係立法會前議員霍震霆大仔霍啟剛都做咗中出常務會董，似乎啟剛都有意喺政壇有一番作為。
設計圖片
有傳象哥有意力捧周浩鼎做接班人，所以不時帶佢去識吓啲業界前輩。周浩鼎喺上屆只係常務會董，今屆就升做副秘書長。其實中出核心領導層大部分人都係廠商，但周浩鼎只係一名律師，唔屬於商界出身，能夠喺中出擔任要職，再次證明象哥背後發功有一定影響力。
啟剛擬鋪路從政
不過，許華傑一向有意做中出立法會代表，話晒當年佢爸爸許長青都係做緊中出立法會代表，後來因病退選先由象哥頂上，所以中出部分元老都認為，象哥早就應該將議席交棒畀許華傑。由於許華傑已經先後擔任過中出秘書長同副會長，所以今屆一係升任會長、一係自動降一級做番副秘書長，最終佢降呢做副秘書長，到一六年仍有機會同周浩鼎拗手瓜爭做中出立法會代表。
再睇近年主力做青年工作嘅啟剛，唔屬於中出活躍人士，但今次一躍成為中出常務會董，唔知係咪有心人刻意幫佢鋪路從政呢？或是有人想佢遲啲接手做中出立法會代表呢？
有政界中人分析，啟剛鋪路出任中出立法會代表呢個講法都唔係無可能，因為現時體育、演藝、文化及出版界議席已由馬逢國擔任，即使啟剛有意繼承爸爸個衣鉢做體育界議員都唔係易事，所以可能搵定後路都未定。
