政壇：顧明均心寒 拒浸大授博士銜

理大學生會內訌 六莊員請辭

顧明均喺書面聲明中指出，見到近日佔領行動示威者多番使用暴力衝擊執法嘅警隊及各種霸佔道路，既違法又野蠻，剝削市民使用道路嘅權利，並騎劫其他市民嘅民權及自由，成為威脅政府的籌碼。佢又力撐警方依法執法，仲好同情有警員在處於嚴重挑釁嘅惡劣環境下向示威者作「大懲小戒」，這種涉及違法違規行為實是「佛都有火」，人之常情喎。

除咗上述問題外，顧明均話近日見到馬時亨喺接受頒發榮譽博士時受到侮辱同不尊重，所以佢呢個時候唔應該亦不敢接受浸大嘅殊榮，希望浸大取消向佢頒發榮譽博士學位。浸大遇到咁嘅情況點算好呢？浸大發言人話，好有誠意向顧明均頒發榮譽博士學位，浸大校長陳新滋已親自聯絡顧明均，希望佢出席頒授典禮。

另外，理工大學學生會亦爆內訌，幹事會六位莊員昨發表聲明集體請辭，矛頭指向評議會，當中涉及錢銀轇轕。聲明話九二八事件後幹事會曾向評議會申請撥款支持佔領人士，但評議會突然加碼幾倍，仲放入私人戶口，令人質疑利益輸送。聲明又指不滿會長賴偉健過分側重外務，令幹事會之間缺乏溝通，昨網上流傳會長嘅請辭信，本報聯絡過佢，但截稿前無覆。