政壇：林健鋒受惠流會去慶生

身兼行政會議成員的商界立法會議員Jeffrey林健鋒話，公司票變個人票並唔係無可能嘅事，但當中涉及非常複雜嘅議題，包括在增加選民人數時，要確保界別嘅代表性；如果只係針對某啲界別「開刀」，又可能會引起不滿，所以詳細點做仲要慢慢研究。

尋日係Jeffrey六十三歲生日，原本諗住成日留喺會議廳坐定定走唔甩，但點知立法會大會因為開會法定人數不足而流會，無啦啦多咗一日假期，令佢可以同屋企人慶祝生日，簡直係雙重開心。佢嘅辦事處職員尋日就特登幫佢搞咗個生日派對慶祝，令佢喜出望外。

佢喺許願時話，生日願望係世界和平，又自爆囝囝喺夜晚預訂咗一圍酒席同佢慶祝，下午更加帶埋女性朋友同佢食午飯，搞到佢好開心，講笑話想林家可以快啲繼後香燈喎！