政壇：政總公僕為搵食「佔鐘」
好多喺金鐘同中環返工嘅打工仔，經常怨搵食難，事關喺呢個金融中心地帶，包括政府總部嘅公務員同上班一族幾乎同一時間放飯，食肆逼爆，搞到冇啖好食。之不過，依家佔領行動堵塞咗金鐘嘅主要幹道，倒轉頭又輪到啲食肆嗌救命，幫襯嘅上班族人數大幅下降，搞到生意額大跌。
正如我哋日前報道過，政府總部及特首辦公室嘅公務員，因為受佔領行動示威者堵路影響，一度要將「竇口」移師到中環舊政府總部、即中區政府合署西座，直至周一先全體歸回原位辦公。不過，部分公務員喺舊政總開工不但樂不思蜀，返到政府總部與其日日落區同佔領人士爭位食飯，索性沿夏愨道「步行街」落灣仔食飯，仲大讚「佔領」方便咗佢哋開飯添，但就唔經唔覺參與「佔鐘」喇。
飯堂新不如舊 員工紛轉場
政府總部飯堂近日有新承辦商進駐，點知新開張不但遇着佔領行動，據聞有政府總部同事試食後覺得新飯堂麻麻地，無論質素同價錢都比唔上之前嘅承辦商，唔少都寧願轉場到立法會飯堂，同立法會員工爭飯食。不過，呢個「飯後感」只係部分人意見，唔代表大多數人嘅意見，可能有人覺得好食都未定。
部分公務員眼見昔日飯堂、毗鄰政府總部嘅中信大廈連日被示威者封鎖出入口，鄰近嘅統一中心、海富中心又長期被示威者「佔領」，因此索性經夏愨道佔領區，步行至灣仔春園街一帶開餐，估唔到「佔領」幫公務員慳咗程港鐵車費。
