城中鏡：財金界添喜事 「股壇小甜心」嫁主播

Sonija同任職傳媒嘅未婚夫拍拖三年幾，兩人係做訪問時偶然認識嘅，之後發覺同對方幾啱傾同相處融洽，就繼續發展落去。依家修成正果，大家梗係戥佢哋開心啦。佢未來老公，係電視台財經節目主持伍嘉文，唔知佢哋平日得閒會唔會傾吓世界金融大事，又或者齊齊討論吓炒乜股呢？

南韓團隊影結婚相

Sonija會喺尖沙咀嘅酒店舉行結婚典禮，而且喺中午舉行，等大家食完自助餐仲可以慢慢傾，安排都唔錯呀！Sonija話婚後兩人會到馬爾代夫度蜜月，先享受二人世界，造人計劃就隨緣啦。想睇下Sonija靚靚嘅結婚相，但佢話佢哋都要到下月十四號（即婚前一日）先攞到啲相。雖然結婚相喺香港影，但原來佢哋搵咗一隊南韓團隊影，佢哋要先將啲相傳到南韓整理，然後再傳回香港，一來一回就用咗唔少時間。