佔領行動令好多商戶生意大減，中華總商會永遠名譽會長Jonathan蔡冠深亦唔例外。早前我哋見到Jonathan，問佢有冇受到佔領行動影響，佢呻話梗係有啦！尤其係佢喺尖沙咀廣東道一間酒店內開設嘅日本料理店，客戶取消晒訂枱，佢焗住自己搵埋朋友去食，但都要改搭小輪過海，然後行過去，都幾傷腦筋。

蔡冠深（中）同太太蔡關穎琴（右）及囡囡Jocelyn（左）結伴出席活動。

Jonathan講講吓感嘆話今年認真倒楣，先係年初越南排華暴動，集團已經損失唔少。點知最近越南同天津公司不約而同門口被封路，事關當地興建嘅地鐵工程啱啱經過門口，所以員工出入都要兜個大圈，非常唔方便。再加埋香港嘅佔領行動唔知搞到幾時，難怪佢咁晦氣。

公職大豐收

咁多不如意事一齊發生，唔通Jonathan今年犯太歲？佢笑笑口話，呢層就唔知喇，因為佢唔迷信，冇算過流年喎！不過諗番轉頭，Jonathan又話今年喺社會公職上都算大豐收，獲頒幾個榮譽頭銜，算係咁啦！

第一手消息請下載on.cc東網iPhone/iPad/Android/Windows Phone Apps