城中鏡：卸任校董會主席 陳智思嶺大「畢業」
多位名人尋日獲嶺南大學頒發榮譽博士學位，包括恒隆地產董事總經理Philip陳南祿同著名文學家劉以鬯等人。除咗受頒榮銜嘅名人獲親友撐場極開心之外，見嶺大校董會主席Bernard陳智思都一派輕鬆，事關今次係佢最後一次主持嶺大活動，今日將「畢業」卸下主席職位。細數喺嶺大校董會十五年光陰，Bernard話最大挑戰係前年嶺大遴選校長風波，令佢畢生難忘。
陳智思今日告別嶺大校董會。
陳南祿（右）同太太伍淑恩（左）一唱一和，指日日都有慶祝。
保安局前局長李少光（右一）專程嚟捧場。
難忘校長遴選風波
前年嶺大前校長陳玉樹辭職，被視為「梁粉」嘅鄭國漢獲委任為新校長，嶺大學生反應十分激烈，事件擾攘咗大半年。Bernard話當時選校長花咗相當長時間處理，可以話係一個好好嘅經驗。雖然尋日畢業禮有學生以各種行動抗議，但佢認為學生今次想爭取嘅議題比選校長時更廣，冇影響活動進行，而且同前年有學生要求參與遴選校長事件相比，學生行為並唔激進。校董會吸取前年嘅經驗後，面對依家嘅狀況就處理得好啲。
獲頒榮譽工商管理學博士嘅Philip獲太太伍淑恩甜蜜撐場，Philip話嶺大有個以佢外父、美心集團創辦人伍沾德命名嘅演講室，但係太太從未親身去過，所以難得尋日有機會，佢就帶埋太太一齊去參觀吓。今次係Philip事隔十年後再次獲頒榮銜，問到佢哋會點樣慶祝，太太就笑笑口話日日都同佢慶祝喇！講起佔領行動獲好多學生支持，Philip話當年佢做學生時更激進，仲叫大家千祈唔好搵番佢七十年代喺港大啲學生相，講笑話唔透露自己做過乜，費事過咗招畀大家喎。
