政壇：港鐵傳出喜訊貫通南風隧道
港鐵南港島線（東段）工程滯後六個月，至依家仲未能確定通車日期。港鐵尋日終於傳出「喜訊」，話呢條新線嘅南風隧道已喺本月十七日貫通，稍後將陸續展開隧道內軌道鋪設、軌道旁電線嘅鋪設同埋架空電纜安裝工程。至於南港島線嘅整體工程，截至上月底亦已經完成七成八嘞！
南風隧道的隧道壁工程已完成約八成。
工程團隊慶祝南風隧道貫通。
隧道內擺放冰塊，有助降低工地溫度。
額外注漿費時
港鐵話南風隧道嘅鑽爆挖掘工程喺一二年八月展開，共使用咗五百噸炸藥，進行咗七百五十次爆破，挖掘出大約二十八萬立方米泥石。港鐵工程總監周大滄就話，呢條隧道沿線嘅地質係南港島線（東段）項目其中一個最大挑戰，挖掘工程先後穿越灣仔峽斷層帶同馬己仙峽斷層帶，由於斷層帶夾雜岩石同鬆軟泥土，隧道入水機會大增，因此工程團隊須花較長時間進行額外注漿同隧道鞏固工程。
全長七公里的南港島線（東段）喺一一年五月動工，由金鐘至海怡半島，途中在海洋公園、黃竹坑同利東設站，以隧道同高架橋形式建造，項目採用中型鐵路系統，繁忙時間班次約三分鐘一班。
