政壇：鍾國斌有得震無得瞓

二○一四年選民登記運動結束，選舉事務處尋日向立法會政制事務委員會交代最新選民登記數字，發現俗稱「超級區議會」嘅區議會（第二）功能界別登記選民數目有增無減，相反二十八個傳統功能界別登記選民不升反跌，重災區係教育界、紡織及製衣界等多個界別，選民人數下跌數百至近二千人不等。

設計圖片及對白

外界分析最受影響係前年先首次當選嘅紡織界議員Felix鍾國斌，如果未來一、兩年選民數目繼續有減無增，Felix一旦要競逐連任似乎有得震無得瞓嘞！

對教育界影響輕微

根據選舉事務處最新資料顯示，超級區議會登記選民有三百二十五萬人，比往年上升三萬一千人，不過傳統功能界別嘅登記選民有二十三萬二千七百人，數字比往年下跌五千三百人，當中四個重災區依次係教育界下跌一千九百一十七人，飲食界下跌一千三百八十二人，紡織界下跌三百六十七人，衞生服務界則下跌三百四十六人等。

有心水清嘅政界中人分析，教育界議員葉建源同紡織界議員Felix前年都係首次當選，突然遇到業界登記選民下滑，真係唔知是福是禍。

其中對於教育界嘅影響相對輕微，一來本身係泛民支持者票倉，就算流失選票料都不會令選舉結果逆轉，連葉建源都話業界選民人數多，估計對佢嘅影響唔算好大。

至於同樣面對登記選民下跌嘅Felix，就似乎反應緊張得多，尋日特登詢問選舉事務處，點解部分功能界別登記選民數字出現下跌，舉例指佢嘅業界有一萬三千多名合資格選民，但當中只有三千多人登記做選民，就此詢問政府有無方法鼓勵多啲傳統界別代表登記做選民。

署理總選舉事務主任馬笑虹回應的時候強調，指選舉事務處每一年，都會向傳統功能界別的市民發出信件，鼓勵佢哋登記做選民，力撐現行的措施相當有效，真係信不信由你嘞！