SUN搞作：打橫嚟講：笑不出的爛Gag

兩批軍警企定定後，軍頭宣布：「依家，我哋落旺角清場。信佛嘅，去山東街口拆教堂；信耶穌嘅，去旺角道移除關帝廟……咁就唔怕無得上天堂，又唔使驚要落地獄啦！（大叫）明唔明白？」

散仔甲：「阿頭，嗰度仲有隻本土金翅大鵬鳥喎！」

軍頭：「咁！通知漁農處啦！」

* * * * * * * * * * * * * * * * * * * * * * * * * * * * * * * *

近兩日的「警民衝突」，警方少了用胡椒噴劑狂射示威者，當民眾暗喜終於能以愛感動前線散仔時，竟有「德高望重」的權威人士爆料，話警方的胡椒噴劑缺貨咋！

英國生產商乘勢抽水，話撐民主運動，唔賣貨畀對付人民的殘暴政權。

被指殘暴政權的心戰室，立刻出招還拖，召開記招，有一男子代表發言：「請市民放心，就算無英國製造的胡椒噴劑，我哋都唔會用強國貨的，唔係怕啲貨唔夠強，而係怕佢係假嘅！即使無噴劑，我哋警隊都有救火消防喉咁粗咁勁嘅胡椒噴柱，一樣可以擊退暴民，保護市民財產嘅……」

記者問：「噴柱都無貨呢？」

一男子：「哦！我哋仲有催淚彈嘛！」

記者再問：「催淚彈用晒呢？」

一男子：「唔怕！我哋會用橡膠子彈！」

記者三問：「子彈都用完呢？」

一男子嘴角一翹：「出解放軍囉！」

一男子旁邊的私人助理幫口補充：「都係最衰英國，唔供貨畀我哋至會搞成咁o架咋！」

* * * * * * * * * * * * * * * * * * * * * * * * * * * * * * * *

耶穌像崩了頭，關二哥斷咗手，將來，誰人無得上天堂，邊個落地獄，才不是笑話咁簡單！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府