名媛傅明憲同藝人馬德鐘尋日出席狗隻慈善步行活動記者會時，傅明憲透露自己近日經常到處旅遊，先後到過峇里、日本等地，所以曬得一身健康膚色。

傅明憲（左）同馬德鐘都係愛狗之人，稍後齊齊參與狗隻慈善步行。

佢話：「我之前去潛水，考咗救援潛水員牌，即係萬一有潛水員失蹤，我有牌可以救佢。」佢坦言自己早喺二○○○年已經考咗潛水牌，依家繼續考唔同嘅潛水牌照，不但學到更多嘢，仲增加玩潛水嘅推動力添！

至於喺前年領養咗金毛尋回犬嘅馬德鐘，坦言會參與狗隻慈善步行，佢話：「開頭隻狗細個好難處理，之後我哋成家人同佢一齊去上堂，依家佢好聽話，好開心。」

第一手消息請下載on.cc東網iPhone/iPad/Android/Windows Phone Apps