城中鏡：施文信金曲盡訴香港情
施文信卸任馬會主席後，最近接受馬會支持刊物訪問，大談四十年香港情，並憑歌寄意挑選多首金曲送畀各方好友，其中一首金曲《We are the champions》，就送畀馬會同事，認真鬼馬。
施文信來港四十多年，憑歌寄意贈予各方好友。（資料圖片）
六九年喺蘇格蘭來港嘅施文信，七四年成為馬會會員，而且由專業會計師做到出任馬會主席，並喺香港落地生根，名副其實係「老香港」，要佢話當年真係講十日十夜都講唔完，所以憑歌寄意，最簡而精，因此佢揀咗《Stand by me》同《You'll never walk alone》來代表馬會同市民嘅密切關係，而一首《Somewhere over the rainbow》，就最適合送畀自己喎。熟識呢首歌歌詞嘅人都知道，入面有句「只要敢做夢，一定會夢想成真」，一切盡在不言中嘞！
唔講唔知，施文信原來曾喺本港擁有六匹愛駒，狂熱程度不下一般馬主，而愛駒通通以蘇格蘭一個地區名稱「高原（Highland）」命名，原因係佢好鍾意呢個地方，希望透過愛駒命名同呢個地方有啲連繫。
