楊哲安話若果佔中無止境嘅話，佢總有一日會撐唔住。
話說教育局前政治助理Jeremy楊哲安喺前年離開政府後，就重返商界「搵真銀」，出任獵頭公司執董，有份幫大公司請人。之不過，佢尋日出席一個論壇後就趁機吐苦水，透露唔少大公司因為佔中，取消咗喺香港舉行嘅會議，搞到獵頭公司上個月生意額係歷來最差，直言如果佔中無止境，自己總有一日會撐唔住。Jeremy再三強調，佔中影響好多人生活，要求立即停止，又質疑佔中依家去到銅鑼灣、旺角等地點，批評有人無口齒喎。
又難怪Jeremy係咁呻嘅，事關佢老婆楊張新悅喺上個月誕下第三個囡囡，家庭成員多咗，開銷又大咗，雖然佢未至於手停口停，但生意差嘅話，收入自然有影響，再加上生活壓力大咗，又真係好難頂嘅。
第一手消息請下載on.cc東網
