黃以謙
作為一個區議員，最緊張嘅未必係居民需要啲乜，而係自己能唔能夠連任。新一屆區議會選舉話咁快明年年底就上演，唔少區議員都做足準備應戰，積極同唔同政治組織打好關係，通俗啲講法就係食幾家茶禮。不過，咁又唔怪得佢哋，家陣政治氣候咁多變，做區議員泊多幾個碼頭都係好事。
建制派區議員要當選連任，除咗個人努力經營地區工作外，背後嘅團體組織支持都好緊要，所以部分區議員都會一人身兼多個組織嘅成員，好似九龍城區議員黃以謙，去年加入咗建仔，但仍然同其他建制派政治組織保持友好關係，其中一個就係立法會廠商會代表林大輝一手創立嘅地區組織社區十八（C18），據聞C18低調運作一排後，最近有重新活躍之勢，早排C18成員仲一齊食飯聯誼添！
食兩家茶禮嘅唔止黃以謙一個，本身係「創建力量」副主席嘅觀塘區議員姚柏良，原來亦保持住C18成員身份，似乎呢股風氣臨近區選，只會更為一發不可收拾嘞！
第一手消息請下載on.cc東網
