政壇：黑英勸學生離街頭抗爭
喺佔中三大佔領區域中，以旺角爆發衝突次數最多，前日唔少示威者頭部被警棍打中，最終發生流血事件。一向關心時事嘅天文台前台長「黑英」林超英早前已喺網誌話擔心旺角混亂嘅情況會變成一九八四年的士罷駛演變成暴動嘅翻版。黑英尋日又喺網誌撰文，慨嘆現時佔中已經變質，唔再似係當初嘅純潔，呼籲學生係時候返屋企、讀好書，留番畀孔武有力、好勇鬥狠嘅人上街頭抗爭喎。
林超英
黑英喺文中認為民主之路漫漫長，學生喺前線抗爭作用唔大，應該讀好書，將自己放喺第二啲更有用嘅地方好好發揮，至於前線街頭抗爭，就留番畀好勇鬥狠之士。有人認為黑英咁講只能話佢講啱一半，一來佢似乎將學界中人同文質彬彬嘅弱質書生畫上等號，二來邊個話學界中人無孔武有力嘅人物呢？
講起佔中，黑英又趁機點評立法會議員EQ葛珮帆嘅表現，佢話起初以為EQ份人好衝動，但睇完對方喺立法會發言段片，就覺得講得有理有情。
唔知EQ係咪見有人讚兩句就開心得滯，尋日竟然出新聞稿自我吹捧，自爆當日發言短片喺網上錄得三十萬次觀看，而且喺熱門影片排行第一位，不過多人睇可能有兩種可能，既可以係多支持者，亦可以係多人睇完先至炳佢一餐，睇怕EQ為穩陣計，都係咪開心得太早住嘞！
