佔中行動令社會嚴重撕裂，撐警同反警各持己見，就連獨立監察警方處理投訴委員會（監警會）內部亦都出現呢個情況。監警會兩個委員Kenneth梁繼昌同馬恩國，就分別因為撐佔中同反佔中高調表態，惹來對方陣營批評。據聞兩人至今仍然唔肯避席監警會會議，仲因為立場鮮明而收到唔少投訴信，其中Kenneth截至上周已經收到過百封市民投訴信，唔知道呢次監警會點處理呢？

設計圖片及對白

身兼立法會會計界議員嘅Kenneth，日前喺泛民記者會批評警方涉嫌毆打「佔領中環」示威者，仲佩戴埋象徵支持佔中嘅黃絲帶，結果就搞到畀市民投訴，有人仲要求佢離開監警會添，據聞已有過百封投訴信寄咗去監警會，有監警會成員估計，投訴信只會愈收愈多，睇怕監警會都要就事件回應下。而馬恩國亦唔好得去邊，因為佢喺社交網站上將自己頭像改為代表撐警方嘅藍絲帶，雖然唔夠五分鐘就移除咗，但呢單嘢喺網上廣泛流傳，搞到馬恩國都收到唔少投訴，話佢唔保持中立。

梁非嚴重投訴會成員

兩人收到大量投訴前，Kenneth早已喺監警會會議中建議，若任何委員對佔中有強烈政見，應該避席，不過同係監警會委員嘅馬恩國就唔認同，話如果要避席，大把監警會成員要避席喎。最終大家都無下結論，兩人亦都無避席，先會搞到今時今日咁大件事。

其實，所有針對佔中投訴個案，會交由監警會轄下嘅嚴重投訴個案委員會跟進。而Kenneth本身並唔係呢個委員會嘅成員，故可以話係間接避咗席。不過，馬恩國就係嚴重投訴個案委員會成員，如果單睇表面證據，似乎馬恩國要避席多過Kenneth要避席囉！

第一手消息請下載on.cc東網iPhone/iPad/Android/Windows Phone Apps