政壇：搞搞政：廠商會選會董 大輝心淡退出

據知情人士透露，上月初廠商會拉隊訪京，獲某位國家領導人高調接見。據聞喺閉門會面期間，廠商會某位德高望重的元老發言時，初初原本都係好廣泛咁講吓客套說話，點知突然話鋒一轉，點名盛讚大輝多年來擔任廠商會立法會代表，功勞唔小，但大輝將嘗試參加直選，仲讚大輝好勇敢添。據聞在場的大輝臉色一沉，在座會董們亦嚇咗一跳，事關大輝一直未表態係留低抑或出走，元老咁講無異於將大輝一軍，令佢心灰意冷。

自由黨「提親」食檸檬

自從前年底不顧廠商會立場，喺立法會支持對特首提出的不信任動議之後，大輝同廠商會的關係即出現微妙變化，個立法會議席更不時有傳聞，大輝方面，自由黨黨魁田北俊早前公開向大輝「提親」，揚言願讓出黨魁之位同佢現時立法會新界東議席，吸引大輝入黨，但係大輝仍然不為所動。