國際著名珠寶設計師羅啟妍早前就將過往十次都在美國紐約舉辦嘅亞洲協會「羅啟妍藝術設計文化講座」，首度帶到來香港舉行，向來愛採鴛鴦造型打扮嘅羅啟妍，呢日只戴單邊耳環，佢話冇留意只係戴咗一邊，可能唔記得咗喎，至於着鴛鴦鞋就真係習慣，但亦唔需要特登去襯，因為早已變成佢嘅一種生活態度。

羅啟妍（右）大讚身旁蕭逸係出色嘅科技企業家。

羅啟妍好鍾意鴛鴦造型打扮，鴛鴦鞋更已成習慣。

至於佢手上嘅戒指，就係由四粒唔同顏色嘅大珍珠組成，佢話，隻戒指係好多年前的設計，佢好鍾意。當晚演講嘉賓仲有著名科技企業家兼Outblaze創辦人蕭逸及創意經濟之父約翰．霍金斯等。對於已經持續超過二十日嘅佔中運動，蕭逸有比較另類嘅睇法。經常游走唔同地方工作嘅佢話，撇除討論呢場運動嘅結果，二十幾日以來，港人凸顯咗一種特質，就係同身邊陌生人合作嘅能力非常之高，例如運送物資咁，萬一有日不幸發生天災，預計港人一定可以好高效率咁互相配合，印證香港市民嘅質素的確好高喎！

第一手消息請下載on.cc東網iPhone/iPad/Android/Windows Phone Apps