政壇：郭偉強擺酒搵地方頭痛
立法會議員郭偉強明年二月就會同拍拖多時嘅女朋友拉埋天窗，佢透露，結婚細節差唔多已經搞掂，但就煩緊擺酒點算好。事關佢諗住請晒成個立法會同東區區議會所有同事，但依家就搵唔到大型酒家，好頭痛咁話。
郭偉強話，佢熱衷傳統中式婚禮，但唔少酒樓最多只係擺到四、五十圍，如果請晒想請嘅人，又唔夠位坐，只係請一部分人又唔係咁好。開頭，佢都有諗過喺酒席前搞個小小嘅雞尾酒派對，招呼晒所有朋友，但問吓價錢竟然要成十幾萬元，於是打消念頭。擺酒第二煩係菜式，八道菜減至六道菜，又畀女朋友話寒酸，最後，佢淨係剔走菜單上嘅魚翅，為環保出一分力。
