政壇：侯志強邀鄭文雅推廣單車

新界鄉紳最近潮興玩單車，經常揸名車出入嘅上水鄉事委員會主席侯志強，尋日仲牽頭成立「香港單車協會」推廣單車運動，搵咗鄉議局主席劉皇發等一齊出任永遠榮譽會長，最養眼嘅，仲係請到喺元朗大棠村長大嘅前港姐冠軍鄭文雅出任單車大使。

侯志強（右）牽頭嘅單車協會邀請鄭文雅（左）出任大使。中為協會主席劉遠平。

打開高爾夫球嘅鄭文雅自言係一個新界人，六歲起已經自學大人單車，每日來回上水返學，依家即使搬咗出跑馬地住半山，仍然靜靜雞買咗架單車，得閒「飛車」落斜到地面行街，可惜半年後被老公發現，仲以安全理由沒收單車添。鄭文雅笑言，今次出任單車大使，就可以大條道理買番架單車踩喇！

侯志強致辭時就雄心壯志，話適逢新界多條單車徑先後落成，都要幫手推廣單車文化至全港、東南亞甚至全世界，協會仲計劃組隊參與內地鹽田單車節添。協會主要由侯志強等幾個北區鄉頭揸旗，據講係為未來一連串選舉開拓北區年輕村屋居民票源，以單車話題取代傳統蛇齋餅糉，更易冧年輕選民咁話。