政壇：吳文華籲兩派 冷靜付出惠港
佔領行動持續二十幾日，違法抗爭喺社會上引起嚴重反彈及撕裂，立法會嘅泛民、建制兩派議員，更大打激烈攻防戰，呢個時候，理性嘅聲音好珍貴，立法會前秘書長吳文華（Pauline）雖然退咗休，但對香港發生嘅大事仍然好關心，佢就呼籲建制派同泛民主派要冷靜，為社會整體利益出發，仲話依家係考大家智慧嘅時候，希望雙方都有所「付出」，咁樣未來才有希望。
設計圖片及對白
立會天書寫到公民參與
Pauline好熟悉議會運作，近日泛民喺立法會發起不合作運動，同建制派及政府爭拗愈來愈激烈，佢坦言，明白泛民主派同建制派企喺對立面，好難坐低慢慢傾，但咁樣正正考議員嘅智慧，希望大家共同協調及討論下，能夠為社會帶來利益。Pauline認為，大家都要付出一啲嘢，雖然短期可能令支持者失望，但長遠就有益處。自言政治中立嘅佢，唔肯講對佔領行動嘅睇法，但就尊重大家表達意見嘅自由喎。
立會之外，佔領行動亦令社交網站湧現一片「unfriend潮」，好多人將激烈言行帶到網絡世界，結果搞到另一啲人以「不再是朋友」作回應，Pauline似乎唔多了解呢個現象，話佢唔係好知咩叫「unfriend潮」，佢上社交網站只係睇吓女兒嘅相片，或者係咁，都唔會有困擾啩。
Pauline退休後一直幫立法會寫緊有關議事規則多年演變嘅「天書」，最近已經寫到第三部分，同公民參與有關，佢話，佔領行動嘅發生同所產生嘅影響，將會令本書嘅內容更加豐富。
