城中鏡：港大法律校友下月開騷勤練歌
音樂係快樂嘅泉源，香港大學法律學院一班校友五年前開始組織一個合唱團，成員一年比一年鼎盛，適逢港大法律學院今年四十五周年紀念，一班熱愛音樂嘅團員收工後趕往上環排練，密鑼緊鼓籌備下月十五日公開演出一系列迪士尼經典主題曲。佢哋日間係嚴肅嘅法中人，夜晚就披上音樂外衣，練習仲非常投入添。
一班熱愛音樂嘅法律畢業生趁收工趕往上環排練，預備法律學院四十五周年紀念演出。
廖玉玲（左）非常支持合唱團演出及運作，旁為指揮沈智輝。
黃碧如（右）與張志英都對歌唱好有興趣。
港大法律畢業生會合唱團集合唔同年代嘅校友，但佢哋表現專業，一啲都唔似業餘樂團，原來佢哋好多都學過音樂。好似指揮沈智輝（Jeffrey），四、五歲開始學鋼琴、小提琴及低音大提琴等多種樂器，現時公餘時間會義務擔任合唱團指揮累積經驗。佢話好多律師每日生活只有工作，長期對住堆書好苦悶，音樂豐富咗佢哋生活，亦令一班校友關係密切好多。
記性好睇譜快入腦
唔少聽過佢哋演奏嘅人，都讚佢哋咬字清晰，但Jeffrey同合唱團主席黃碧如（Cleresa）就覺得合唱團最大特色，係大家都好大膽，可能平日習慣出庭，加上背慣書同案例，睇譜好快入腦，所以即使冇乜練習，表演時都一樣咁有台型。今次演出，Jeffrey特別揀咗呢兩年幾乎個個小朋友都識哼嘅《魔雪奇緣》，希望擴闊聽眾群。
多得法律校友會主席廖玉玲帶領校友會一直支持，加上樂團司庫張志英（Teresa）為合唱團開源節流，佢哋暫時每年都有盈餘可以撥入獎學金資助母校學生，未來更打算與其他慈善機構合作回饋社會。
