「佔領行動」未啟動前的大半年內，不少商家佬及一眾死硬派日日話會破壞香港經濟，尤其對中環的金融業務不利；而期間，富豪接受電視訪問，說佔得幾耐吖？嗰一兩日點會有大影響吖？果然係有遠見的明燈，抵佢發達嘅！那一兩個不學無術嘅低質經濟學者亂噏假數據唬人，還被有料的經濟學人踢爆後，夾尾收聲了！

勿說佔領「中環」一區幾日，家陣佔領遍地開花近二十日（其實，只得旺角、老銅和金鐘三區），香港經濟上有幾多損失呢？

我哋不能不看事實，而胡亂虛報「軍情」，害得大陸領導有誤解判斷的！

嗱！十一長假期來港的大陸客同上年比較，增多了六點幾巴仙，消費力無減少，佢哋來港買金，唔在旺角老銅買，咪逼爆德福、太古城囉！

香港啲大型金舖是集團式經營的，何來損失？大家有無見佢哋老細出嚟喊苦喊忽吖？香港股市亦日日狂升呀！

小商舖無生意做？嗰兩三日，當藍絲帶及蒙面口罩黑幫鬧事時，確嚇親街坊，依家，早已如常落街打邊爐食花生啦！仲有人去睇新樓盤添！

據我在旺角觀察兩星期（自差人射催淚彈後計），旺角佔領區（即亞皆老街及彌敦道交界）四周商舖，除了馬會投注站仍關門唔收馬纜外，附近的麻雀館、砵蘭街的骨場、夜總會咪一樣燈火通明。而道路要塞的先達旁的小巴站，無人堵塞，可由亞皆老街去到觀塘；另朗豪坊向元朗去的小巴站頭，一樣路路暢通，邊有阻人搵食啫！

連亞皆老街百老匯電器舖門口如常擺滿十數檔非法買賣iPhone的大陸人，即使在差人面前，照舊經營，邊有影響呢？

當然，總有人因「佔領行動」而蒙受損失和無得益的，咁要香港政府處理啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps