立法會大會今日復會，議會內外都可能有一場大戰，放完暑假歸來，議員都好應該專心議吓事，但政府日前向立法會提交新立法議程，一四至一五年新立法年度中，政府打算提交嘅條例草案只有十六項，幾乎比上年度少一半，仲多數都係預計冇咩爭議嘅。草案咁少，唔使問係政府驚咗「拉布戰」，寧願睇情況再定，咁嘅工作量，秘書處都冇乜壓力喇，唔知秘書長陳維安係咪一身鬆晒呢？

設計圖片及對白

上年大塞車 見過鬼怕黑

上個立法年度，政府向立法會提交嘅條例草案名單多達二十八項，當中唔少都極具爭議性，結果咪畀議員「拉布」搞到條例草案「大塞車」囉。見過鬼怕黑，政府喺新年度中就好有保留，十六項擬提交嘅條例草案中有七項計劃喺上半年提交，九項喺下半年。而擬提交嘅條例草案中有七項都係由財經事務及庫務局負責，預料唔會有太大爭議。

至於與政制相關嘅條例草案就只有兩項，包括關於被定罪或判監人士喪失參選或擔任公職資格嘅《選舉法例（喪失資格條文）（修訂）條例草案》，同有關一六年立法會選舉嘅《立法會（修訂）條例草案》，而後者更要視乎有關公眾諮詢而有所變動。莫非呢招就係政府唔畀班泛民癱瘓立法會嘅策略？

第一手消息請下載on.cc東網iPhone/iPad/Android/Windows Phone Apps