政壇：馬豪輝唔認同IS暴行

控制部分伊拉克及敍利亞土地嘅極端組織「伊斯蘭國」（IS），早前因發放斬殺記者人質嘅暴力片段而令全球嘩然。日前一個宗教活動上，我哋見到中華回教博愛社顧問馬豪輝，作為回教徒嘅佢，都話對伊斯蘭國嘅激進行為完全不能認同。

馬豪輝

馬豪輝話，其實伊斯蘭國只係佔極少數嘅極端分子，並唔係所有回教徒都係咁，佢對有關血腥行為感到痛心，又話大部分回教徒都係仁慈善良同主張和平嘅，所以希望大家唔好將佢哋一概而論。

至於會否有人因為對佢哋認識唔深，又或睇完報道之後驚咗佢哋同有戒心，馬豪輝坦言，可能真係有人會誤會，如果係嘅話就會澄清一吓，而教會方面則認為清者自清，先做好自己，身邊人就自然會明白喎。