佔領運動上月底啟動時，警方首日喺金鐘政府總部外發放催淚彈圖驅散人群，坊間更流傳一個消息，話警方當晚要求各個電訊商截斷通訊，以防示威者互通消息。行政會議成員、新民黨立法會議員葉劉淑儀尋日出席一個午餐會時，「證實」警方當日真係有截斷通訊，大家都以為葉太有內幕消息，事後我哋問番佢，原來佢只係引述網上流傳消息，咁算唔算「隨口噏當秘笈」呢？

葉劉淑儀

葉太一向都質疑佔中背後係咪有組織支持，尋日午餐會就有人質疑建制派點解支持引用《立法會（權力及特權）條例》調查由民間發起嘅佔中。葉太話作為旁觀者，見灣仔一帶有好多有組織活動，示威者有源源不絕物資，食物好過警察。佢哋又由灣仔搬走屬於政府嘅路障去到尖沙咀同旺角，又有先進科技，「就算九月二十八日警方喺金鐘截斷通訊，佢哋仲可以聯絡」。

葉太後來澄清，其實警方截斷通訊只係引述網上流傳，重申警方否認有此做法，又話聯絡唔到只係因為太多人作怪喎。警察公共關係科總警司許鎮德被問及「截斷通訊」一事時，就話要時間了解，唔通真係被葉太講中？

第一手消息請下載on.cc東網iPhone/iPad/Android/Windows Phone Apps