城中鏡：顧紀筠撐乖仔 入圍巨聲無內定
近年瞓身商界發展嘅顧紀筠喺出席一個鐘錶品牌專門店開幕時透露，同該品牌都有生意上合作。問到幾時輪到佢嘅品牌開店？佢笑言：「我個手錶品牌得兩個款，唔適合開店，啲租金又貴，我想推向海外巿場。」
顧紀筠（左）戥身旁的囝囝入圍歌唱比賽高興。
提到佢仔仔陳浚霆入圍《超級巨聲4》，佢好開心咁話：「佢入咗圍先同我講，叫我去現場支持佢，嚇到我一身汗，有十年冇返過無綫，原來做觀眾好緊張，鏡頭成日影住你嘅反應，希望佢從中學到嘢。好多人問我係咪內定，邊有得內定，選美就可能有，呢個係好公平。」
「做歌手要好捱得」
佢話仔仔自小喜歡唱歌，佢安排對方跟專業老師學歌藝，又話：「佢十幾歲就問我可唔可以做歌手，我話你讀完大學先，讀完大學又問，我話做歌手要好捱得，你出去捱下先，佢就做咗幾年公關。依家佢入咗圍，我要反轉以前嘅態度，要支持佢。」
對仔仔係咪有信心？佢話：「我聽完其他參加者後，同佢講其他人唱得好好，如果輸咗係非戰之罪。佢喺我哋屋企，永遠都係最好嗰個。」
