城中鏡：李家祥買眼罩抗伊波拉
喺西非爆發嘅伊波拉病毒日前已蔓延至西班牙同美國等地，而坊間更有傳隨時最快會喺三星期內殺入香港，但前日喺沙田馬場見到多位名人，佢哋就話唔驚喎。馬會大董Eric李家祥話香港人經歷過○三年沙士一役，市民衞生意識非常高，好似佢太太咁，就成日提醒佢同人握完手記得唔好摸眼耳口鼻。
李家祥（右）話太太（左）經常提佢握完手唔好捽眼。
陳國民指好多電器都可以消毒衣物或食具。
黃士心話唔去西非就唔驚伊波拉病毒。
黃士心避去非洲
Eric話咁恐怖嘅沙士大家都經歷過，當年仲個個都驚空氣傳染而買晒一堆堆口罩，萬一伊波拉來到，大不了再去掃眼罩。佢又話依家交通咁發達，每日咁多人坐飛機周圍去，就算真係殺到嚟都避無可避。但佢始終覺得香港嘅非洲人唔多，相反內地廣東省就有好多，所以要驚都唔係香港人驚先喎。
「家電大佬」德國寶集團董事長陳國民就話，市面上有好多電器都可以消毒衣物或食具，未覺得要買眼罩同保護衣。康泰旅行社董事長黃士心亦所見略同，原來佢以前都經常去撒哈拉沙漠等非洲地區公幹，好似依家咁嘅情況，唔去咪得囉。
講起「病毒」，國際黑客組織「匿名者」近日攻擊多個網站，被問到驚唔驚馬會網站成為黑客攻擊目標，Eric話馬會網站每日都好多人瀏覽，所以佢哋長期都處於戒備狀況，對呢類活動當然非常警覺。
