SUN搞作：打橫嚟講：退守公民廣場，誰贏誰輸
不少身居外地的友人來電「慰問」，擔心我這個住喺旺角的香港人安危！
在外地朋友眼中，香港特區已成為一個暴亂的戰區，因佢哋日日從新聞看到身掛藍絲帶或以口罩蒙面的黑幫暴徒亂咁打人，而香港差佬又唔執法，可能係現場的前線指揮官只准有權放催淚彈之故吧！
說香港特區好亂，又啱咗一半，尤其是佔領者與香港廢柴政府的博弈策略上，雙方都簡直係「精神錯亂」！
佔領者一方「釋出善意」，放言只要香港廢柴政府重開公民廣場，讓佢哋返回舊地使用，佢哋就會撤出金鐘道作交換，此等愚不可及的蠢方案，係邊個二五仔諗出嚟o架！「公民廣場」本來就係市民合法使用的，原屬市民的資產，只不過被廢柴政府粗暴霸佔，佢哋好應立刻無條件交還至啱，家陣，你班「不是我們代表」的「扮代表」去「和談」？
山賊擄人後取贖金，還要加碼再勒索，你哋仲傻到「以物易物」？究竟換來「佔領廣場」有乜好處呢？
佔領者是升斗小市民，無政治智慧，所以做蠢事，是情有可原的，但香港廢柴政府的決定，就更加白癡絕倫，居然關門拒絕「交換」條件，真廢到無朋友！
你畀班小朋友「移居」返圍滿高牆的「廣場」，不單只開番金鐘道方便群眾，取悅民心，仲可以將「示威者」困在牆內，易於監控，咁都唔「開放」廣場，唯一理由，係等交通不便，增加市民怨氣，製造更大仇恨感去不滿佔領者，以人民鬥人民，愈亂愈好。
而佔領方的「代表」有無想過，依家香港廢柴政府千依百順，乃因遍地開花的佔領區人多勢強，廢柴政府才無計可施，如果你哋縮吓一步，退吓一步，到無人無物時，你估你哋仲有無籌碼同人談判呢？用吓腦吧！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
