政壇：搞搞政：立法會周三復會建制派恐遇狙擊
原本喺上星期三召開新一年度嘅立法會大會因佔領行動而取消，尋日行政管理委員會開會後，決定聽日大會同後日特首答問大會如期舉行。不過，班建制派議員經歷過新界東北發展衝擊後，似乎見過鬼都怕黑，顯得好驚青，尋日喺行管會會議上就諗出唔同方法，睇吓點樣可順利進入立會大樓。據聞，有人建議秘書處要安排一架中型小巴去港九四處接班議員開會，然後去到最近立會嘅地方落車，等佢哋步行入立會。
建仔驚「訪客」夾攻
呢條橋真係唔知邊個諗出嚟，大家可以幻想吓，如果佔領區突然出現一架小巴，十幾二十個建制派議員眾目睽睽下經過路障行入立會，你估會發生乜嘢情況呢？所以聽聞有部分建制派議員唔打算坐小巴，寧願自己一支公大搖大擺行去立會，反而無咁覺眼。甚至有議員話，如被佔領示威者包圍，甚至襲擊，可畀人知道佔中幾暴力同唔講道理喎。
有口痕友就爆料，話一班富貴黨同經民聯嘅功能界別議員，其實好擔心成為集會人士狙擊目標，所以希望警方在立法會附近戒備，一有乜嘢事就可衝入立會保護佢哋。唔好以為得商界政黨會咁騰雞，有建仔議員就擔心喺立會「屈蛇」嘅示威者「裏應外合」，希望引用消防條例，限制立會大樓每層人數唔可以超過一百人，諗住咁樣就避免到有太多示威者「訪客」。
主席曾鈺成尋日就宣布，周三大會公眾席只容許十人旁聽，並實施黃色同紅色警示制度，黃色警示包括授權秘書長召喚警方到大樓內候命，而紅色警示則包括暫停會議、撤離大樓使用者及要求警方採取行動，而各黨派必須在今日前提交明日嘅訪客數目。
答問大會凍過水
至於周四係咪繼續舉行答問大會仍有隱憂，雖然曾鈺成話應該會如期舉行，點知特首辦就話，特首當日係咪出席答問大會，要視乎當日有無不受干擾通道，目前為止未見有適當安排確保官員出入平安。不過，秘書處昨晚同特首辦始終傾唔掂點樣安全送特首進出立法會，皆因車道及行人路皆不通、保安員未有足夠信心保護特首、召喚警方進場協助或會惹爭議，照咁睇，似乎周四答問大會都係凍過水。
