政壇：許智峯 張國鈞 連任區會危危乎
近日中西區區議會除受「佔中」影響搞到人人頭痕外，據知明年嘅區議會選舉亦提前開戰，其中許智峯、張國鈞兩位分屬不同陣營嘅議會新丁都面對「對家」挑機；其中許智峯因為多次「大鬧兼佔領」區議會觸發民意危機，傳建制派至少有兩人劍指許智峯個位，誓要踢走佢。
張國鈞
瞄準許智峯個位嘅，據了解係一個本身任職牙醫嘅地區人士劉尉欣，佢近兩、三個月忽然高調，繼早前加入中區街坊福利會提供服務外，後獲民政事務總署委任為中環及半山分區委員。雖然佢報稱獨立，但同時加入區內多個親建制派社團。另一加入競爭嘅，就有傳係該區委任區議員文志華。
除咗許智峯，外號「企鵝男」嘅張國鈞喺一一年以二十四票之差險勝白鴿黨莊榮輝，據知西環選區受重建影響，新街坊以中產、外籍人士為主，加上莊榮輝敗陣後呢幾年冇停過地區工作，誓要重奪議席，所以張國鈞都要居安思危醒醒定定先得喇。
