政壇：政總難享安樂茶飯
俗語話「辛苦搵來自在食」，打工仔女咁辛苦都係為咗食餐安樂茶飯，但身在金鐘政府總部嘅公務員，要食得好、食得安心就唔係咁容易喇！皆因自從政總三年前入伙，都面對唔同嘅挑戰，公務員食飯以至飯堂經營都好艱苦，政總兩代餐廳都遇劫數，莫非政總真係風水唔好？
政總二○一一年入伙時，餐廳承辦商諗住有穩定數目嘅公務員返工，應該都穩賺冇蝕，點知開張嗰年年底就爆發退伍軍人症病菌，記得連時任教育局局長嘅孫明揚都中招，政總餐廳拍晒烏蠅，老闆慨嘆當時生意足足跌咗一半，曾經諗過乾脆摺埋退出，但最後都決定繼續留低艱苦經營，期望守得雲開。
終於捱到有錢賺嘞，但好景不常，該承辦商去到今年中再入標，但遭產業署以「價高者得」通知佢唔中標，飯堂做到上月二十六日就結業。如果大家好記性，應該記得當日晚上，學民思潮同學聯去到罷課尾聲，突然叫參與者闖入政總東翼公民廣場，最終演變成提早「佔領中環」。撞啱政總飯堂同時易手，搞到一班公務員食飯都唔多方便，有官員講到明要預半小時買飯添！
早午餐混亂做唔切
直到尋日，飯堂新承辦商終於開業，但政總就因為佔領行動而受影響，職員返工以至運送食材都幾麻煩。我哋尋日朝早去睇過，發現職員都要熟習新環境，又試過同一時間賣早餐同午餐，但午餐做唔切，搞到諗住早啲食飯嘅保安員要等一段時間先有飯開。再係咁落去，班公務員可能又要去其他地方搵食，咁政總餐廳又會拍烏蠅，睇嚟新老闆都要諗吓橋點樣應付嘞！
