城中鏡：立會飛魚甩底 馬逢國乾身打氣

大會邀請到署理政務司司長張建宗、新世界聯席發展總經理Adrian鄭志剛等人擔任主禮嘉賓主持起步禮。不過，舊年報名參加渡海泳嘅五位立法會議員全部甩晒底無落水，剩番體文界馬逢國一個喺船上幫參加比賽嘅健兒打氣。

立法會一眾議員今年因為唔同原因而無參加今年嘅渡海泳賽事，當中有「立法會飛魚」之稱嘅紡織及製衣業界鍾國斌同金融界吳亮星就因為另有公務而無法出席比賽。會計界梁繼昌就話原本報咗名參加公開組賽事，但因為有太多人報名而抽唔中，令一心游維港海水嘅佢非常失望。

馬逢國本來都報名參加不設時限嘅悠游組，可惜一樣都係抽唔中，但佢話近來太忙淨係練過一次水咁大把，所以都係留番出年再參加過。雖然佢尋日無得落水，但仍然坐足全場幫手頒獎，仲周圍幫人揸機影相，非常風騷。

張建宗愛登高少游水

繼一眾特區官員喺十．一搭船去灣仔金紫荊廣場出席升旗禮後，張建宗尋日亦特登由西灣河搭船去鰂魚涌為大會主持落水禮。張建宗原本淨係着住件黑色網球衫，但唔知船上係咪太大風，佢之後又喺件衫上面加咗件風褸擋風。佢話平日好少游水，反而鍾意登高遠眺，喺山上面欣賞城市風光。

鄭志剛就話自己雖然未試過游渡海泳，但想當年讀書時都有參加學界嘅游泳賽事，有一年仲幫學校攞到獎牌。雖然Adrian都算係游泳健將，但佢就透露自己仲未有時間教兩個小朋友游水，話等佢哋大個啲先算喎。

信興集團副主席蒙德揚話今年出任業餘游泳總會司庫一職，所日尋日專登都嚟幫手打點一切。佢話自己早兩年都有游過渡海泳，當年讀書時更加試過打破水運會一百公尺紀錄。除咗打理家族生意外，佢都有為本港體育發展出一分力，早前帶咗一班運動好手去仁川出席亞運，下個月又會去日本福岡跑馬拉松。