設計圖片及對白
佔領行動除令政府總部三千個公務員返工麻煩咗外，據悉公務員內部同整個社會一樣，因佔中立場不同而分成兩派。較傳統嘅公務員由於恪守政治中立原則，平時喺辦公室已經少講政治，但新一批入職嘅公務員，就因為年輕貼近佔中示威者，故偏向支持佔中及同情示威者嘅處境，亦鍾意挑戰現有制度，變相搞到連政府內部都有支持佔中同反對佔中兩派人士。
該批年輕公務員不時用內部電郵、whatsapp等社交媒體同同事分享佔中消息，遇到反對嘅聲音或者意見，佢哋更加會索性喺社交網站「取消交友」（unfriend），總之十足十依家社會嘅縮影。雖然唔少主管都對呢個情況心知肚明，但由於分化情況太過嚴重，佢哋都係私底下叫啲員工唔好再討論事件，而無去採取實則行動。
重申政治中立
有資深公務員向我哋爆料話，之前喺一個為即將退休嘅二級行級主任（EO）舉行嘅歡送會上，有資深行政主任上台致辭時鬧爆學民思潮發起人黃之鋒，話佢喺出席國慶升旗禮時刻意背向旗杆兼大打交叉手勢，擺明係無視國家同一國兩制。台下唔少支持佔中嘅公務員聽到後即時議論紛紛，有人仲想企起身同該資深行政主任辯論，但礙於場合而唔敢出聲。
之不過，公務員事務局局長鄧國威尋日繼續死撐話公務員士氣無受佔中影響，仲向市民大派定心丸，話相信公務員會緊守崗位，繼續服務市民。被問到有政總員工戴黃絲帶返工有無違反公務員規定，鄧國威只係顧左右而言他，重申公務員要政治中立，所作所為唔可以影響工作，令人覺得有偏私。想問一聲局長，公務員戴黃絲帶返工，仲係唔係政治中立呢？睇嚟佢係隻眼開隻眼閉啫！
第一手消息請下載on.cc東網
