政壇：青聯七子呻佔中苦水
青聯七子 大談佔中佔領行動持續，唔少社會知名人士紛紛鬧爆佔中影響經濟，又叫學生盡快撤離示威區。青聯七位年輕商界代表委員尋日喺銅鑼灣分享佔中嘅影響，但就無去佔領區域同青年對話。如果佢哋放下身段落區，效果會唔會更好呢？
洪為民同其他青聯成員分享佔中影響。（資料圖片）
中華全國青年聯合會常務委員施榮忻話，有朋友喺三子宣布佔中前夕將架車泊咗喺金鐘示威區附近，點知連日封路搞到佢揸唔走架車，每日仲要付泊車費五百大元。本身有寫字樓喺海富中心嘅菁英會前主席洪為民，因為佔中開始時要去機場搭飛機而無揸車，所以部車無滯留金鐘。香港青年聯會主席霍啟剛就呼籲兩派支持者冷靜思考點樣可以解決問題，而唔應該繼續互相指罵。
七個人七嘴八舌講佔中影響同勸佔中市民及早撤離，唔知有無打算七個人分散去三區，直接聽下佔中者嘅訴求、體驗下佢哋嘅生活、向佢哋曉以大義，同埋勸佢哋早日回家呢？話晒青年同青年溝通，最少無年齡之間嘅隔膜吖！
