政壇：周四特首答問會惹火恐取消
話說立法會原定喺上周三復會，但因建制派擔心出現保安問題同令示威者重新增加，最後被迫首次取消，延至本周三先復會。近日喺立法會大樓外嘅示威者人數少咗，據聞大部分建制派都傾向本周三如期開會，但喺翌日即周四舉行嘅本立法年度首次特首答問大會，就有唔少建制派建議取消。
為免刺激示威者，梁振英自佔中啟動後一直甚少公開現身，如果佢周四如期出席答問大會，就係佢自警方施放催淚彈後，首度喺金鐘佔領區附近出現。有建制派議員話，如果警方喺周四前仍未成功清場，梁振英現身金鐘肯定會引發大混亂，甚至令整座立法會大樓被攻陷。如果到場時已經清咗場，示威者亦可能因梁振英現身而重新集結，令佔中死灰復燃，因此建議對方避多陣風頭先，等警方同建制派都好做啲。至於梁振英會否「迎難而上」，堅持走入佔領區，相信過多一、兩日就會有決定。
