政壇：天文台唔止報天氣介紹香港美麗一面
天文台近年添置器材自行製作高清天氣節目，仲派出科學主任喺電視天氣預報環節擔任「天氣小姐」同「天氣先生」，向市民講解未來天氣情況。呢啲「天氣小姐」同「天氣先生」除咗要喺攝影機前粉墨登場外，仲要負責撰稿、設計圖像、剪接同傳送片段等，可謂自編自導自演，台前幕後「一腳踢」。
李鳳瑩負責撰稿、設計圖像、剪接同傳送片段等，可謂台前幕後「一腳踢」。
楊漢賢到大帽山拍攝雲海，發現香港有好優美嘅景色。
80後天文台科學主任李鳳瑩三年前入職，係天文台首批訓練嘅「天氣小姐」。佢話每日拍攝天氣預報節目時，需先與同事開會商討天氣預測，隨即撰寫稿件、設計圖像，然後到錄影室錄影，再將片段剪好傳送到各電視台。佢認為工作好有使命感，責任重大，撰稿過程令佢更了解市民需要，作出更準確嘅預測，又話：「我哋嘅決定對公眾影響很大，例如發出暴雨、颱風警告，都要好謹慎。」
新節目受歡迎感鼓舞
「天氣先生」楊漢賢就話天氣預報係每位科學主任必經嘅第一關。佢回想入行冇耐即遇上十號颱風約克，既緊張又興奮，佢話：「上班途中驚險重重，不斷有大樹倒下。」佢話刮颱風時，天文台嘅工作量大增，除咗更新颱風資料，仲要發出唔同嘅警告，同其他政府部門保持聯繫，同事間合作「忙而不亂」，令佢體會好深，更愛上咗呢份工。
天文台最近成立「天氣廣播站」團隊，楊漢賢負責新節目「氣象冷知識」，介紹有趣氣象，例如季候風、天文台測量儀器等，由決定題材到拍攝剪接均由佢同另外數人包辦。其中一集到大帽山頂拍攝雲海，令佢記憶猶新，「無諗到香港原來咁靚，真係大開眼界！」節目播出後，觀眾反應奇佳，令佢深感鼓舞，希望日後製作更多節目，加深巿民對天氣認識，亦向市民呈現香港美麗嘅一面喎。
