政壇：鬍鬚曾訪美隱惡揚善

鬍鬚曾仲表示，自己有份向美國人解釋班學生點解要佔領添！似乎鬍鬚曾去到美國，份人真係唔同啲喎。佢應該係隱惡揚善，以免變相唱衰香港，而唔係紅皮白心啩？

身在美國六日嘅鬍鬚曾，尋日又再如常化身「鍵盤戰士」，寫網誌回顧過去六日嘅點滴。原來美國人除咗羨慕香港失業率低至百分之三點二同低稅率仍可達致收支平衡外，最關注就係佔中發展趨勢。根據鬍鬚曾講法，唔少美國人覺得今次佔中雖然有出現激烈衝突，但竟然無人嚴重受傷、無人縱火、無人破壞，仲話咁和平嘅情況喺美國無乜可能出現，絕對係一國兩制嘅成功例子。

臨尾呼籲離開街道

美國人咁緊貼佔中形勢，但鬍鬚曾話自己都唔知點發展落去，只能向美國人解釋學生示威訴求同背景，例如示威學生希望爭取更開放嘅提名方式，唔想單由一千二百人組成提名委員會。講下講下，鬍鬚曾好似變咗發言人咁，話學生訴求可以理解，而且仲得到部分市民認同。

現時政府同佔中人士打緊仗，鬍鬚曾作為一個司長講出呢番說話，唔知其他人聽到後有乜嘢諗法？會唔會覺得鬍鬚曾隱惡揚善呢？幸好鬍鬚曾最後都有兜一兜，話示威同學已經透過佔領，將信念深深刻畫喺每個香港人腦海，係時候離開街道喇。如果鬍鬚曾唔講呢句，睇怕反佔中人士分分鐘將矛頭指向佢。